This poem won first prize in Gorseth Kernow in 1997

Mernans an Gof

	Dyskys down kyn nag oma · my a vyn deryvas dhys a dheu Gernow gerys da · ha del vons y dystrewys. Myghal Joseph an kensa · gof yn Plu Gevern genys. A Vosvenegh y gyla · Tomas Flamank o gylwys.
	Harry Tudor, turont bras · Kembro cref, craf y bythneth, revaneth o y vynnas · gwan y glem dhe’n gorholeth. Y’n Tour Loundres y ladhas · an pryncys flowr flogholeth ha’y vylyny a vlamyas · war Dhuk Gloucester yn tyveth.
	Duk Gloucester curunys o · ha Myghtern Rychard hynwys, mes y whruk Harry gustla · bell erbyn y bryns untys ha wosteweth y wana · Desempys yn mysk an dreys curun Rychard kefys ve · ha gans an drokwas degys.
	Mes y sordyas er y byn · tont ha prowt yn pow Alban Duk Evrok pomster, Perkyn · map myghterneth nyns o man. Y tyby tern Dyneydyn · y vos ascor eghen splan hag a’y wovys-ef yn tyn · rafna North an tyr gans tan.
	Y kewsys Harry yn cler · na wre perthy tretury mes y ros-ef y ordyr · bones res dhe’n bobel ry yn pup plu ha tre toll vur · moy es del yllyns tylly, rag prena caskergh asper · erbyn gorthter Gwydhyly.
	“Ren ow anwan,” ’meth an Gof · “Kemmys my ny vynnaf pe. “Kernow boghosek yth of · nyns yu dynerth ow dywla. Y’m kentryn colon ynnof · mos dhe Loundres heb lettya may hyllyf provya prof · dhe’n kyng crefny yn y se.”
	Dhe Joseph y comendyas · Flamank fur, den an lagha: “Gwren-ny cruny kevva vras · creffa ny’s kefyr nefra. Ny a bys a’n myghtern gras · agan toll may lehaho.” An Gof henna pan glewas · caslu cuntell a wruga.
	Dre Bow Saws an Gernowyon · hep gul trespas a gerdhas cosel yn cres ha gwyryon · Pyle pynak may trygas cuntelles an dyogyon · an comners a’s wolcummas. “Re’s bo bennath Dew avan” · boghosogyon a gryas.
	A-bell dhe’n Yst y kerthsons · der oll Gwlas an Haf a-hes erna hedhas an cothmens · dhe’n ger wella Wells gylwys. Y’s metyas an cytysans · gans gwres ha dynargh densys. Y teth dhe’n baner dyblans · Audley baron enorys.
	Pan esa prest an lu mur · lent dhe Loundres ow nessa war an myghtern gans bysmer · bysy an dus a grya. Y helwys Harry, “Ny’m dur · godros peryl pos kyn fe.” Muvys ve y veppyk sur · ha’y vyghternes quyt a’n le.
	Own a’s teva hag anken · meny an myghtern y’n lys. Erghys ve dhe’n chamberlyn · Daubeny dyberth uskys dhe wytha der y nerth men · pobel pencyta dhowtys na ve den, flogh na benen · gans "ruthow rebels" shyndys.
	Yth esa an Gernowyon · yn tyldys y’n termyn na yn Guildford rag an seson · (yu yn Surrey burjestra). Yth omsettyas soudoryon · Daubeny dour warnedha. Res o dhodho gul kylden · seyth soudor ledhys pan ve.
	Yn Henley an myghtern fell · ryp an avon a sedha may halsa dyank yn snell · towl ter orto mar teffa. Y tanvonas yn dan gel · cannasow y’n nos dhedha: y fya frank dyogel · dhodho omry a wrella.
	Ger an myghtern pan glewas · Tomas a ve trom serrys “Prak na vyn-ef deryvas · bones tollow bras lehes? Kethneth kens es myghternas · yu yn gwlascor Saws an gys. Erbyn Dew yth yu peghas · gul dhe’n bobel bos pyllys.”
	An Gof a gryas “Cothmens · myttyn y whyrfyth an gas. Ot yn-hans an eskerens · ha’ga gonnys mur y’n stras. Haneth pup den Dew pysens · na vo coward yn tyflas. Nyns us genen yn defens · ma’s pykys ha colon vras.”
	Gwener o, seytegves deth · a vys Metheven dyson, war Wun Deptford myttynwyth · ryp an pons dres an avon may whruk breseloryon freth · dyerbyn an dyogyon— colonnekter fast ha fyth · erbyn mergh ha marghogyon.
	Nyns us geryow y’gan yeth · may hyllyf dhys leverel del wruk kemmys kescoweth · omlath manly kens merwel. Pan dheth noswyth woteweth · y whruk stryf ha tros tewel. Galsa gwaytyans gans an jeth · kellys Kernow war an gwel.
	Yn harow y fe fethys · Flamank fur war wel an gos. Gof Sen Kevern o fyys · sawder sentry dhe gafos— mes y feva dalghennys · yn tre Greenwich dre dholos pan dorras an dus ervys · scos sacrys a sans eglos.
	Tryys ve kens pen treddeth · Flamank ha Joseph kefrys deudhen na wruk cam bythqueth · mes herwyth justers an lys (brus anewn ha camhenseth) · yth ens traytours negedhys, gwyw dhe vones hep pyteth · tennys, cregys, quartronys.
	Pan esa an Kernow cref · dhe’n croghpren ow pos tennys, orth an ruth ha glew y lef · Joseph jentyl a gewsys: “Edrek vyth nyns us genef · kyn fyf yn tyn tormentys. My a gyf lowena nef · ha nefra hanow y’n bys.
	Gosloweugh, a bobel dha, · orthyf-vy kens ow thormens. A’gas myghtern my a wra · dheugh-why profya profusans: hedhyu kynth yu-ef pys da · y te possa rebelyans. Cales vyth y’n cas nessa · dhodho na ve dres yn nans.
	Deu yu y vebyon genys · Arthur ha Henry byghan. Arthur ny welvyth henys · kens y brys ef a dremen. Y vroder a vyth hatys · kyn fo hembrynkyas hautyn. Ny’n jevyth henath a bys · ethves Henry y honen.
	Ef a vyn despytya Dew · ha sans eglos dyspresya. Yn maw y er a verow · ha’y dhyw vyrgh anvab a wra (wheryth wherow) yn un rew · rewlya war an wlascor ma. Myghtern Albanas a’s sew · dhe’n gurun rag governa.
	Ankevys vyth yn tyen · tylu an Tudors anwhek, pan vo de pymp cans bledhen · trelyans an termyn a dhek roweth, rychys ha fortyn · dh’agan mamvro druan dek ha byth clewys war bup myn · mel melodyes Kernewek.”
	Y porthas ancow ahas · Myghal Joseph cuf colon, gof Plu Gevern, a garas · Kernow ha’y genesygyon. Y coth dhyn ytho whylas · Kernewesow, Kernowyon, gruthyl worshyp dh’agan gwlas · onen hag oll par del on.