Marthus gans Nicholas Williams (Golvan).
Submitted to Gorseth Kernow in 2010

Marthus

	Dell lever an Lyvrow dhyn · drog-Satnas yw dragon vras, tebel-brev der envy tynn · mes a’n nevow a godhas, vylen venymys, a vynn · dyvlasa mab den pub plas, avello ev may kellyn · golow lowena an Tas
	Herwyth jornal Jowan sans · lost an lowt yw cledha crev; par dell yw ansans y whans · scubya ’wra dredho a’n nev sterennow dhe’n nor war nans · (Belsebuk bylen yw ev!) in spit dhe Grist ha’y gothmans · —gweyth hegas an hager-brev.
	Mytern Davyth i’n salmow · progeth porra fel a wra, den in Duw (bras dhyn y brow) · pub dydh mar pydh ow fydhya, ev dhe allos yn salow · poyson prevyon conqwerrya, ha heb peryl bos marow · in dann dreys dragon trettya.
	I’n salm an dra derivys · yw gwelys gwir diogel, i’n lyver yth yw prevys · a scrifas profus Danyel. Yth o dragon onorys · in pow Babylon abell, ha kyn nag o va ervys · den sley Duw a’s dyswruk snell.
	Ev a ros dhe’n crav cowlek · (connek cast an cog) cakys, hag inhans pelour ha pek · gans colys poth o pebys. Y’s loncas an uth anwhek · ha tardha, sqwat! yn sqwardys, gans pobel lettrys ha lek · may feu an Gwir-Dhuw gordhys.
	Yth hapnyas pell alemma · in Lydda, le dyscrassys, in fenten fresk an dre-na · bos sarf dhysawour sedhys. Unn davas yonk pub jorna · mar ny dhrens (gober dybris), dhe denna dowr ny asa · an dus i’n dinas trigys.
	War an dyweth an dhragon · garow hy gnas, a sconyas berryk-on yn weryson · vyrjyn hy a dhervynnas. Y feu prenn tewlys yn scon · (sorr sarf y a sewajyas); goev mytern war y dron · offrys y vyrgh pan viras!
	Jory sans o soudour bras · Cristyon cuv, crev ha prevys; an dra wherow pan glewas · mowes mytern dewysys, spas a dhydh ny dhylatyas · strait dhe’n fenten y fyskys; an best hegas a hackyas · dre weres Crist dasserhys.
	Redys yw i’n istory · a gasoryon colon vras dre gledha, guw, bregh ha bry · ow tystrewy dragonas. Yn fen y fensen dhywgh why · a dhensa dour derivas; dre ras Crist leun a vercy · heb arvow sarf a dhovas.
	Pontifex, pregowther glew · o Sylvester kerys clor; ev a drailyas dhe Jesu · Costentyn, pensevyk flour, ha Cesar dre grejyans vew · a sensys Crist in onour, hag erhy may fe mab Duw · gans benyn gordhys ha gour.
	Y sordyas serrys yn fras · (ny rens gras dhe’n Tas avan) orth Costentyn fas dhe fas · lies pystrior pagan; dygudh y a’n cuhudhas · (connar o cry pubonan) “Nyns yw lowen tus an wlas · aban veus trailys Cristyon!”
	’Ma sarf, drog-spyrys grysyl · in cav down rybon trigys! Rag an hager-dhragon vil · res yw dhis agan dyffres: der anal boos an uthvil · ow mos in stray i’n stretys a’n burjesy moy es mil · in spas un mis yw moldrys!”
	Cesar strait dhe Sylvester · (ev a’n estemya dremas, den scav y skians, consler) · ’dhanvonas ger dre gannas. Gorthebys an sans somper · nag o ancoth soth an cas; y whre gweres pobel ger · an cyta i’n pyta bras.
	War benn y dhewlin dyson · ev eth, mar grev y grejyans: dallathas an den gwiryon · pesy unn vab Duw dyblans, may wheressa trigoryon · an dinas i’n tynn-dristans. Gwelas densa in vesyon · an kensa pab, Peder sans.
	Peder ger glew a gewsys · sylwans sans dhe Sylvester: “Kemmer i’n tor’-ma genes · bredereth dha dhew bronter; ewgh agas try yn uskys · dhe gav an prev down dyscler. Pan ves ena devedhys · dhe’n jevan te a lever:
	‘In hanow an Arluth Crist · a Varia ger genys, in hanow an Arluth Crist · de Gwener a veu crowsys, in hanow an Arluth Crist · in mes a’n bedh dasserhys, in hanow an Arluth Crist · gans an Tas in nev sedhys,
	in hanow Arluth Jesu · dydh vreus pan vo devedhys, a wra jujya an re bew · ha’n dus marow mes a’n bys, me a’th conjor (trueth yw · kemmys den genes dyswrys) dhe vos dov avell on gwyw · may fes i’n gwylfos ledys.’
	Ha gwra dre golm kelmy · hy ganow gow gans corden, a vydh dha sel warnedhy · crows Crist erbynn an bylen. Gwait an lovan-na sensy · ha humbronk in mes a’n men an dhragon dhov yn esy · i’n gwylfos, i’n genegen.”
	Sylvester sans pan glewas · precept Peder i’n vesyon, heb hockya y’n obeyas · Dew japlen, y dhyskyblon, dhodho straft a somonas · “Deun alemma dhyragon,” yn medh, “dhe’n cav, brawagh bras · abarth Duw bys i’n dhragon.”
	Cans degre ha hanter-cans · aga thry y a skydnyas in cav an cawrvil war nans · erna glewsons uja bras, scrijow scruth ha scrynkya dans · y teu tan ter, fler dyvlas, gans mog mousak warnodhans · hager-bystyk best an stras.
	Y nessas dhe’n nader geth · dyscyplys ha Sylvester. Ev a gewsys gorholeth · a dheskys dhodho Peder, ha den Duw ha’y dhew goweth · colm a golmas gans an ger, ha’y dry dov war an dyweth · avell davas mes i’n air.
	Y’s sewyas dhy dew bagan · ownek in islonk leskys; deuth an Gristonyon in ban · hag y’s cafsons clamderys. Fler, tan, mog a’s gwrug mar wann · cothsons dhe’n dor dysevys. Ny strechyas Sylvester man · (merkyl meur) y fowns sawys.
	Dar! y feu whar prev an pla · dres dowr Tyber dour dyvres, ha gortos i’n gwylfos-na · dov dyvlam erna verwys. Y feu an dom indella, · peryl a Rom removys, hag in crejyans Crist whare · an dhew bagan besydhys.
	Nyns eus dragon whath gesys · in fow fylta, pyt na pith, mes drog-brevyon agan brys · pehosow ha fowt a fydh. Savyour grassys, me a’th pys · pehas poos ow spyrys sqwith dredhos bedhens fest fethys · Arlùth nev, ow enef gwith.
	Pan dhyffy, Crist, dhe jujya · dre justys dydh breus an bys, ow fegh mar flerys kyn fe · ’vell anal mil mylegys, me a’th pys dhe’m pardona · hag a’m pehosow purjys, gwra vy wordhy dhe’th wordhya · yn perfeth i’n paradis.