Gwiasva Golvan

This poem won second prize in Gorseth Kernow in 2000

Deth Lowen


	DETH pur lowen yu! Gwyn agan bys, y hyllyn arta trettya war an tyr! A dhor whek segh, y fynnaf amma dhys ha strayt ankevy gref an trumach hyr.
	Gwren rejoycya fest! An lyf yu de! Alemma rak y fydhyn lun a joy, rak gallas quyt an ponvos a’gan be y’n lester clos, an meny, my ha Noy.
	Deugans deth yth esen, deugans nos yn tygabester lows, hep rewl, hep lyw ’vel mark nyja war an dowr ow mos omma hag ena y’n tewolgow tew.
	Noy ow gour a’n jeva cryjyans cref ha trest y’n Arluth Dew a wruk an bys. “Yth yu,” yn meth ef, “agan Tas yn nef— rak myshyf ef a’n gwyth ha my a’n crys.”
	Crysy y’n Arluth? Dhyn ny nyns o es, benenes ydhyl, ownek agan cher. Annyes bras ny yllyn bos attes mes codha gans prederow yn dysper.
	Báth-rabbím, gwrek Shem, yu guhyth vraf. Y fedha glas hy bejeth prest hag—ogh!— y whre avar pup myttyn wheja claf ha ny a wodhya hy dhe vos gans flogh.
	Yth o devar an gwrageth pupteth oll parusy bos hep lugarn vyth na tan. Kynth esa den ha best ow cruthyl stroll, y whylyn yn ufer synsy an lester glan.
	Cruny a wruk dhyn Jafet agan maw un jeth an deylek rak hy thewlel mes; an kensa prys a-dhya ban dheth an glaw y whelys dre fenester an lyf a-les.
	Stak ena mynsen merwel der ewn uth, “Yn dan an dowrow,” y helwys orth ow fryas, “cudhys yu an menydhyow” ha gans scruth, “Budhys vydhyn certan!” my a gryas.
	“Gallosek yu an Arluth agan scos,” yn meth yn cosel, “Ef yu agan Tas. Kerdhes a wren—y er dhym Dew a ros— arta war an dor ha gonys has.”
	NY wraf ankevy an jeth na nans yu pell ha my a’m eseth a-dal dhe vrow an ys, pan entras Noy ha whystra, “Dew an nell a vyn pup bewnans budhy war an bys.”
	Noy ha’n coscar yonk gans bol ha playn a lafuryas hyr, kyn fedhens squyth, erna ve an frut a whes ha payn a’y saf yn pedrak stanch a-ugh an gwyth.
	Yth esa pup a’m gour ow cruthyl ges, Tubal Cain a’n gylwy pen pyst bras ha foul. Yn wherow scorn a vedha gwres anodho gans y gothmens, ye, ha’y das.
	Vyl o Lamech cothwas, syra Noy, an bylen mousak—poynt ny blekyas dhym. Oll y gows o “gwrageth plenta moy”, “venjans seythgwyth” ha “my a’n lath yn lym.”
	Lyes bobba a dho dhe’n randyr prest rak gweles agan foly—scath hep mor. Lesky a wre vel flam an sham y’m brest a’n jest a wrens a’n gorhel war an dor.
	CACHYA kenyver gothfyl dhyn o res ha gorra copel anedha y’n scath ajy. Y teth an bestas dof aberth y’n cres mes blydhas, nedras, crocodyl, govy!
	Dyflas an brogh ha’n yewgen, lakka whath o sym an folwharth lyk ha’n dowrvargh plos. Brawagh o a’n lew ha pup sort cath a’s teva whans dhe squerdya kyk ha gos.
	Pan entras den ha best, yth esa an glaw ow queskel, ughel y son, war bren an to. Y’n lester cles kynth en ny oll yn saw dre hes an nos ny yllyn cusca tro.
	Nyns o yn few mas agan eth, ellas! rak lemmyn budhys o dyworth an dor pup mowes yonk, pup gwragh, pup maw, pup gwas pup benen semly ha pup fleghyk clor.
	My a remembras oll ow thylu ker y’m gwely y’n gorhel tewl hep cusca tam— marow o ow breder, ow thas somper, ow wheryth cuf, ha (drokka los) ow mam!
	AN GLAW pan slakyas Noy yn mes a’y dhorn a dhyllas bran, na wruk dewheles dhyn. Colom a fryas Noy an nessa torn— y teth hy tre gans olyf yn hy myn.
	Bassya a wre an dowr kenyver deth ha ny a welas trethow segh ha stras. War garn an lester a dyras. Ny oll eth yn mes woteweth gans lowender bras.
	Noy, pen tylu, kettel dheth yn mes, a sevys alter sans dhe Dhew avan ha lesky lothnow glan yn offryn cres hag ydhyn pur, mayth eth an mok yn ban.
	Y’n clowdys dystough gwarak gwelys ve, camneves lenter, promys Arluth len budhy an norvys arta byth na wre mes nefra gasa yn few ha best ha den.
	Báth-rabbím a dhuk (golovas glew) Aram ha Lud dhe Shem, deu evel tek. Hedhyu dywwyth deth pur lowen yu. Alemma rak re bo an bewnans whek!