Gwiasva Golvan

This poem won first prize in Gorseth Kernow in 1999

Cusk lemmyn, cuf colon


	Cusk lemmyn, cuf colon whek, maylys clos y’th lyen dek. Mammyk dhe’th vyn munys ruth a vyn ry yn lowen bay ha dhys cana lull ha lay, ow map ker, ow thresor druth.
	Dyworthyf y fes ledrys gans soudoryon aflythys Costentyn, pen mestrysy. Namna ve ow holon trogh pan ves kybys trom, ow flogh, mes a’m ascra hep mercy.
	Mes my a’th tascafas jy yn spyt dh’aga bylyny— grassys mur dhe’n Tas yn nef. Pan en codhys yn dysper my a’th cafas hep awher dre nerth Jesu Arluth cref.
	Ass o pup Crystyon hegas dhe Gostentyn yn y wlas ha compressys hager tyn gans cledha ha paynys tryst drefen ny dhe wordhya Cryst kens es an dew fals Jovyn.
	Pan y’n gwelas Dew avan, contentys nyns ova man mes orth Costentyn serrys. Y whruk warnodho danvon cleves cragh a lovryjyon na ylly bones sawys.
	Dyfelebys o y fas ha’y gorf dre glaver dyflas, mayth o pos gans pubonen myras orto, pryncys flowr, Costentyn an emperour, dre reson last y groghen.
	Medhygyon a ve sompnys dhe Gostentyn dyberthys. Kyn whrussons dour y whythra, y weres byth ny wodhyens, mes facya fatel yllyns (fecloryon fals) y sawya.
	“Mar teugh why,” yn medhons y, “hag yn gos noweth golghy, yth eugh gwyn avel crystal.” “Mes ple kefyr kemmys gos? Ple ma res,” yn meth ef, “mos dhe gafos an eneval?”
	“Ragough gos best ny amont,” yn meth an fysycyens tont, “Y tal dheugh usya fleghes! Glan dynam yu aga gos, sawment sur rag creghy plos ha remedy podrethes.”
	Costentyn a gomondyas dhe gemeres a ver spas hy flogh dyworth pup norys y’n pendrevy oll adro ha dry an fleghes dhodho ’vel mogh may fens dywosys.
	Pan en attes a’m eseth ryp an chy ma dohajeth, y teth bush bras soudoryon ha settya worthyf asper. Smat ervys hep kewsel ger a’th wrestyas jy a’m dywvron.
	Anfusyk my a whylas gans ujow hag ewynas y lesta, mes y’m tewlys gans mollothow war an dor. Cler y clewys dha lef clor ha stak ena clamderys.
	Tyr myl vammeth varyes ny a wruk dhe Rom kerdhes war hast bys lys an emprour, may hallen dervyn amays agan mebyon ha myrghes orth an bylen yn y dour.
	Costentyn pan woslowas, edrek ef a gemeras ha sham a’y drespas cruel. Agan fleghes restorya dhyn a wruk ha ry mona rak prena gwysk ha vytel.
	Rag ef dhe berthy trueth orth pup flogh ha pup mammeth, Dew a’n sawyas a’y gleves. Purys ve y gorf ha’y fas der nerth Jesu map a ras ha pysadow an Werghes.
	Kettel wruga convedhes y vos sawys a’y dhyses der vertu Cryst map Maryon, pysys Pap Sylvester sans a ry dhodho bysydhyans may halla bones Crystyon.
	Ye, Costentyn · yth yu Crystyon ha nyns us pyn · vyth dyragon; byth ny gefyn · moy posyjyon. Ytho lemmyn · cusk, cuf colon.