Gwiasva Golvan

This poem was Highly Commended in Esethvos Kernow in 1998

An Lowarth Cosel


	OT y’n nans a-hes an hens sentry sans, corlan kerens (dyogel argel an lys) ’ter parwysys paradhys. Ny’s anny blyth, brogh na ky; ’ma pays ha powes ynny. Tek awel y’n tyller taw— gwan gwyns ha’n gwyth yu glansaw.
	BUSH ha pren orth pen bloth Cryst gwedhrys yns ha gwedhowdryst. An ayr yu lym, lom an bar, ’ma pyasen hep kespar. Keser cales, glybor glaw a goth hag ergh hag erghlaw. Rewys mars yu tew ha tyn, gwreugh slyppya sley war slynklyn. Cleghy cales cam ny blek dhe’n alargh (ydhnyk ewlek). Yn dan orny dor kyn fo (ass yu yeyn an dreyn a-dro) blejen ergh yu serth a’y saf, dager gwerghgan y’n gwynwaf. “Ogas gwaynten—gwell dha jer” yu negys tegen Genver.
	HYRDER huth ha heth y’n jeth Cala’ Whevrel y talleth. Gwyn ow bys prys pell y’n plas: gwallow dyflas gwaf gallas. Blejyow gwyns—gwayans a-les— yu lurlen wyn ’dan wedhenskes. Whek an coskenyn a wheth sawor sawya, onyon-eth. Myr arrayys yn un rew afodylys delyslyw— donsyoresow owrys yns, crenna crys yn corolwyns. Melenster yn glesyn glas yu lenter losow lagas ha’n gog a gan clergan (clew!) y’n berlan yn hy blejyow.
	CALA’ ME cuf pan dhe, garth yu lowarth lowena. Gans dons tykly tykky dew a sped dre wernek spernlyw. Mes a’n gwels gryll gwyls a gry dhe’n fonek fyn ha’n fynny. Byth golvanas, gelvyn bras melwhes ha whyl ow whylas. Flowrys yn dan howl a-hes a lenow lawns a lanwes:— bayol, banal, barf an hok, lucys, lywles ha laylok. cala gwely, caja vras, manek ruth, melyon, myllas, gwegbysen, gwenynles, gwek, menta, mynfel ha menkek, malow, molen, mullyon gwyn, gelvyn garan ha glysyn, tormentyl ha tor-men ter, jasmyn jolyf, jylofer. ’Ma moronyon huth yn hons ow plethy gansa garlons hag ot gwenyn (gwana tyn), ow mela—crun yn cryben— awhesyth pan whyb dhe’n Tas yn nevow glas gologhas.
	WOSA tesy helder haf y kefyr kevoth kynyaf. Glybyer blew kefnys gans gluth war brysklowyth boragwyth. Lyes yns, per, merys, mor, avallow (athves ascor), yryn morel (grun a vry) lus, avan sugan, syvy; pos pup pren gans castan cren ha keres (cor ’ga croghen). Cuntell collgnow y coth dhys may fons nos Ollsyns synsys. Tecca wel an wedhen lew pan drelyr lyw hy delyow— melen gell gwynyol yn gwyk, byth gellruth an gellywyk. Scaf yth omwhel del dhe’n dor, y cothans dhywar nothscor. Goth conna cul (costen gon) a nyj gans uj a-ughon. Gwren cunyssa kens es gwaf dhe sesya seson kynyaf.
	NY GEFYS bysqueth y’n bys le moy fusyk, fortynys es jarden. Jorna joy ve may whrug Dew den delynya hag y’n moyha plesont plas, yn garthen ges y’n gorras. Pan dhe gwaf (govy!) dhe’m gyew ha my yn anken ancow, an enef ynnof, tan ef y’th lowarth, arluth arthnef, ha’m purra pegh pura gwra yn gordhyans dha gerensa.